Horas ao teléfono e unhas 50 chamadas para conseguir que lle fagan unha PCR. É a odisea pola que tivo que pasar un pontevedrés para que lle realicen unha PCR logo de días mostrando síntomas compatibles coa covid-19.
O problema de Andrés, o mozo afectado, radicaba en que, a pesar de ser de Bueu, atópase estudando na Coruña. Deste xeito, ao chamar ao seu médico de cabeceira e comentarlle os seus síntomas, este aseguraba que só podía solicitar unha PCR no Hospital de Montecelo. "Estiven desde o xoves da semana pasada ata o martes para que me fixesen a proba", explica o mozo. "Non podía coller dous autobuses e un tren ata Pontevedra para facerme a proba, era un risco".
Deste xeito, o mozo asegura realizar ata 50 chamadas entre o pasado xoves e o martes para conseguir que lle fixesen unha PCR na Coruña. "No número de teléfono da Xunta déronme información contraditoria as veces que chamei, primeiro dixéronme que debía cancelar a solicitude de PCR e pedir un médico de desprazado na Coruña, logo dixéronme o contrario... Cheguei a pensar en presentarme en Urxencias para que me fixesen a proba pero me dicían que se non tiña síntomas graves non ma farían", conta Andrés.
Finalmente, un correo entre un traballador de Montecelo e outro do CHUAC solucionaron o problema de Andrés. "O traballador de Montecelo que me chamaba para citarme enviou un correo a Urxencias do CHUAC e, finalmente, chamáronme". A Andrés fixéronlle a proba o martes pola noite e este mércores notificáronlle o resultado negativo. "Estiven a piques de ir á privada", conclúe.
