A Fiscalía pide seis anos de cárcere para un home de 81 anos de idade ao que acusa dun delito continuado de abuso sexual dunha nena de 13 anos. O caso foi xulgado este xoves na Sección Cuarta da Audiencia Provincial de Pontevedra, onde o acusado negou os feitos, mentres a menor relatou un par de episodios.
Segundo relatou a menor, que declarou durante a vista oral por videoconferencia, os feitos tiveron lugar en agosto de 2017 cando se atopaba xunto á súa irmá na zona de recreo infantil exterior dun restaurante, no que o acusado era un cliente habitual.
En concreto a nena describiu dous episodios. No primeiro deles dixo que o acusado se lle achegou, colleulle a man e fregouse con ela os xenitais. O segundo suceso tivo lugar neste mesmo restaurante do sur da provincia dous días despois cando o acusado pediu axuda á menor para baixar unha escaleira e a continuación empuxouna contra unha parede, agarroulle o cu por encima da roupa e intentou bicala. Ela conseguiu escapar e contoullo á nai.
O acusado declarouse inocente e negou os feitos. "É mentira", repetiu ante o tribunal. Este octoxenario insistiu en que "xamais" tivo contacto coa nena á que coñecía de vela polo restaurante.
O informe dos peritos forenses conclúe que o relato da nena é "crible" e na súa valoración engade que "non hai signos de fabulación nin de suxestión". Pola súa banda, o informe psicolóxico do acusado afirma que parece "improbable" que este home fora autor deste tipo de feitos.
PENAS. A acusación particular considera que o acusado é autor de dous delitos de abusos sexuais a unha menor e eleva a petición de pena a oito anos de cárcere. O Ministerio Público tamén pide que se lle prohiba achegarse ou comunicarse coa vítima durante outros oito anos, e que a indemnice en 3.500 euros polos danos morais causados. O xuízo quedou visto para sentenza.
