Os sete novos deputados do PPdeG que substitúen aos conselleiros da Xunta que renunciaron á acta de parlamentarios, para centrarse unicamente nas súas tarefas no Goberno autonómico, tomaron posesión este martes dos seus escanos, ao comezo do pleno do Parlamento.
Tras este cambio, só o presidente da Xunta, Alberto Núñez Feijóo, e os dous vicepresidentes, Alfonso Rueda e Francisco Conde, manteñen a acta na Cámara galega, mentres que foron substituídos sete conselleiros.
Deste xeito, pola provincia de Pontevedra tomaron posesión do seu novo posto como deputados Moisés Rodríguez —que xa foi parlamentario— e Belén Cachafeiro, exalcaldesa de Forcarei.
Pola provincia da Coruña accederon á Cámara por primeira vez o líder de Novas Xeracións do partido en Galicia, Adrián Pardo, e Rosalía López. En representación da mesma provincia volveron á Cámara Begoña Freire e Miguel Prado Patiño, exalcalde de Frades. Por Ourense tomou posesión Carlos Gómez Salgado.
