Álvaro Nadal descarta un aumento da tarifa eléctrica en Galicia, "salvo que alguén recorra"

O ministro de Enerxía, Álvaro Nadal, descartou este mércores un aumento das tarifas eléctricas en Galicia polo canon eólico "salvo que alguén recorra" aínda que advertiu aos gobernos autonómicos de que pór "impostos" pode producir "efectos indeseados" como que o usuario teña que pagar.

Nadal fixo estas declaracións a un grupo de xornalistas nun acto en Ourense ao ser preguntado sobre un posible aumento da facturación do consumo eléctrico a consecuencia do canon eólico galego e descartou que vaia haber "nada máis" posto que xa se deu cumprimento a unha sentenza xudicial.

O pasado mes de xaneiro, o goberno aprobou unha orde ministerial para a refacturación da electricidade aos consumidores de Castela-A Mancha, Cataluña, A Rioxa e Comunidade Valenciana. "Cando as administracións autonómicas poñen impostos ao sistema enerxético córrese o risco de que isto o acabe pagando o usuario", advertiu Nadal. Así, asegurou que a política do Ministerio de Enerxía, do que é titular, é que a electricidade sexa "o máis barata posible para todos os cidadáns".

A Xunta defende que non se trata dun gravame eléctrico, senón ambiental e que, xa que logo, descarta o posible suplemento territorial. 

O canon eólico en Galicia é un imposto ambiental que grava a contaminación paisaxística das instalacións de aeroxeradores de produción de enerxía eléctrica.