A Consellería de Sanidade comunicou a última hora deste martes a morte dunha muller que fora diagnosticada de coronavirus. A falecida tiña 88 anos e atopábase ingresada no Complexo Hospitalario Universitario de Ourense. Segundo especifica o Sergas, tiña patoloxías previas e non fora vacinada contra o covid.
Con este deceso son xa 2.395 as persoas que perderon a vida tras ser contaxiadas de coronavirus desde o inicio da pandemia e coa infección aínda activa. Rompe así a xeira de dous días consecutivos nos que a Xunta non informara de ningún óbito (domingo e luns).
En calquera caso, a morte da octoxenaria no Chuo produciuse este luns 10 de maio, aínda que Sanidade non comunicou a súa defunción ata este martes día 11.
RESIDENCIAS. Doutra banda, os casos de covid-19 en residencias de maiores da comunidade mantéñense en 13 —11 correspondentes a usuarios e dous a traballadores— e todos están vinculados cun gromo detectado nun centro en Chantada. O foco na residencia DomusVi da citada localidade rompeu o pasado venres 30 de abril 14 días consecutivos sen casos activos en centros deste tipo, desde que o 16 do mesmo mes désese de alta ao último traballador infectado. No caso dos usuarios, remóntase máis atrás para os últimos contagios, vinculados ao brote da residencia Coviastec de Silleda de mediados de marzo.
