Morre o histórico alcalde da Capela López Sueiro, expresidente do Racing de Ferrol

O socialista foi traballador de Endesa nas Pontes e forxou nesa empresa a súa traxectoria sindical
photo_camera Ángel López Sueiro. PEPE DO COUTO

Ángel López Sueiro, exalcalde da Capela e expresidente do Racing de Ferrol, faleceu aos 85 anos, segundo confirmaron fontes do PSOE, do que foi un histórico dirixente na área de Ferrolterra. 

O socialista accedeu ao posto de rexedor do municipio, de 1.200 habitantes, en 1983, ao comezo do segundo mandato municipal da actual etapa democrática. Permaneceu no cargo durante preto de tres décadas e anunciou en 2011 que non optaría á reelección.

Ao mesmo tempo, exerceu como presidente do Racing de Ferrol entre 1984 e 1993. Traballador de Endesa nas Pontes, forxou nesa empresa a súa traxectoria sindical, que o levou a ser presidente do seu comité de empresa como membro de UXT. Durante vinte anos, de 1983 a 2003, foi representante do PSOE na Deputación da Coruña.

O presidente da corporación provincial, o socialista Valentín González Formoso, mostrou a súa "inmensa tristeza" polo falecemento do exalcalde. En redes sociais, apuntou que foi un rexedor "histórico e todo un referente do socialismo da comarca de Ferrolterra".