Os servizos de urxencias localizaban a madrugada deste venres a unha persoa falecida no interior dunha vivenda afectada por un incendio en Ourense, segundo informa o 112.
No inmoble, situado na Avenida da Habana, había outras dúas persoas que se atopaban en bo estado de saúde, a pesar do intenso fume provocado polo lume orixinado nunha habitación. Eran as seis da mañá cando o 112 Galicia recibía a chamada de alerta dunha persoa particular que solicitaba medios para apagar un incendio que, dicía, comezara nun radiador. Con esta información, os xestores do Centro Integrado de Atención ás Urxencias de Galicia avisaron aos Bombeiros de Ourense e pediron a colaboración dos axentes da Policía Nacional e Local.
Ademais, participaron os profesionais de Urxencias Sanitarias de Galicia-061, que só puideron confirmar a morte dun dos tres habitantes da vivenda.
Pola súa banda, os bombeiros fixeron fronte ás chamas, que afectaron a unha habitación.
