A morte dunha persoa que fora diagnosticada de covid-19 eleva a 2.644 as vítimas en Galicia desde o inicio da pandemia, segundo informa este mércores a Consellería de Sanidade. A falecida é unha muller de 95 anos que feneceu este martes 12 de outubro na residencia Bribes do municipio coruñés de Cambre. Segundo matiza o Sergas, a defunta tiña patoloxías previas.
BALANCE. A área sanitaria de Lugo, A Mariña e Monforte non rexistrou ningún positivo en coronavirus nas últimas 24 horas —na xornada anterior contabilizouse 1—.
Así o reflicten os datos facilitados polas autoridades sanitarias, que tamén sinalan un descenso dos casos activos de covid-19. Deste xeito, se o martes notificábanse 69, esta xornada son 66 —3 menos—.
En canto ao número de hospitalizados con coronavirus na provincia, son un total de 6 —2 menos—. Deles, 3 atópanse na Uci do Hula, mentres que o resto áchase en planta: 1 no Hula —1 menos—, 1 no Hospital da Mariña e 1 no Hospital de Monforte —1 menos—.
Desde o inicio da pandemia superaron a enfermidade na área sanitaria un total de 19.635 persoas. En canto ás vítimas, faleceron 260, aínda que o Sergas contabiliza 252 ao non incluír varios decesos de lucenses ocorridos noutras provincias.
GALICIA. A comunidade autónoma rexistra de novo menos de medio milleiro de infectados por coronavirus e menos de medio centenar de enfermos de covid-19 hospitalizados, tras superar un breve repunte da pandemia.
