En tres meses ardeu máis do dobre de monte no Noroeste que en todo 2018

Nos tres primeiros meses de 2019 xa ardeu no Noroeste peninsular máis do dobre de superficie forestal que en todo o ano pasado. Diso deu conta este xoves o Ministerio de Agricultura, cuxas estatísticas revelaron que, entre o 1 de xaneiro e o 31 de marzo, nesta área —que comprende as comunidades de Galicia, Asturias, Cantabria e País Vasco, así como as provincias de León e Zamora— os incendios arrasaron xa case 27.000 hectáreas.

Ao Noroeste correspóndelle o 89,33% do total de terreo calcinado no país, o que equivale a unhas 26.946 hectáreas —case 4.000 de monte arboledo—. En cambio, ao longo de 2018, as chamas queimaran 11.303 hectáreas. Este aumento provisional do 138% en tan só un trimestre responde fundamentalmente ás ondas de incendios sufridas por Galicia, Asturias e Cantabria. No Principado, a Sociedade Asturiana de Estudos Económicos e Industriais estima que as máis de 8.500 hectáreas perdidas neste tempo cuadruplicaron as de todo 2018. E en Cantabria, as 11.000 que rexistrou o Goberno autonómico duplicáronas.

Entre as causas cabería apuntar a un inverno con fases especialmente cálidas e secas, o que incluso provocou que, a finais de marzo, a Xunta vetase a queima de restos agrícolas e forestais, unha das principais fontes deste tipo de sucesos. Destaca que, xa en xaneiro, o presidente da Sociedade Galega de Historia Natural aconsellara evitalas ante as 440 hectáreas queimadas nuns 65 incendios só na primeira quincena de ano.

Logo, o 27 febreiro, sobresaíu a entrada desde Portugal pola serra do Leboreiro —parte da Rede Natura— dun incendio que arrasou unhas 225 hectáreas.

As brigadas tamén tiveron que empregarse a fondo na segunda metade de marzo, sobre todo en Ourense. Pero o 25 dese mes, as faíscas dunha torre eléctrica desataron en Dodro e Rianxo o incendio máis grave en Galicia desde a tráxica onda de outubro de 2017. Queimáronse 1.162 hectáreas e chegou a ameazar núcleos poboados.

Fóra de cómputo, abril arrincou igualmente con lumes en Verín, Boiro e Carballo que levaron por diante outras 150 hectáreas.