Medio Rural beneficia a uns 10.500 gandeiros con subvencións para poder contratar 159 veterinarios

A Consellería do Medio Rural e do Mar resolveu as axudas ás entidades recoñecidas como Agrupacións de Defensa Sanitaria Gandeiras (ADSG) para o período 2015-2016, das que se beneficiarán un total de 10.500 gandeiros.

A Consellería destina máis de 2 millóns de euros, informou este sábado a Xunta nun comunicado.

Das entidades beneficiarias, 69 en total, 52 corresponden a gando bovino, 8 de porcino, 3 de coellos, 3 de aves, 2 de visóns e 1 de gando ovino e caprino.

Nas resolucións tramitadas, tiveron prioridade aquelas agrupacións que presentan maior número de explotacións integradas, maior censo gandeiro e maior número de veterinarios, ademais de favorecer a aquelas entidades que se fusionaron no último ano.

As axudas serven para subvencionar a contratación dos servizos de 159 veterinarios, 79 deles en exclusividade, encargados da supervisión e execución do programa sanitario, alcanzando a axuda ata o 100% do custo do persoal contratado.

Ademais de executar os programas sanitarios voluntarios e participar na rede de vixilancia epidemiolóxica de Galicia, os veterinarios colaboran na formación sanitaria dos gandeiros, nas actuacións complementarias nos programas oficiais de erradicación, no control e fomento das prácticas en materia de benestar animal, e no establecemento de programas de desinfección, desratización ou desinsectación nas explotacións.