O litoral galego acapara as maiores partidas en protección e rexeneración costeira, con máis de medio millón de euros, na estratexia de adaptación ao cambio climático, presentada este mércores en Madrid pola ministra de Agricultura, Alimentación y Medio Ambiente, Isabel García Tejerina.
A estratexia, centrada en protexer a costa do quecemento e restaurar os estragos xa causados, contén 40 proxectos, cuxa dotación económica suma 9,5 millóns de euros.
A Coruña é a provincia galega máis beneficiada, con 240.000 euros, seguida de Pontevedra, con 200.000, e Lugo, con 75.000 euros.
O denominado Pima Adapta, un plan de impulso ao medio ambiente para a adaptación ao cambio climático, é o primeiro paquete de medidas que España dedica a paliar danos en diferentes partes do país e a prepararse ante os que previsiblemente están por vir.
"España é un país moi vulnerable ao cambio climático pola súa condición de península", subliñou García Tejerina, quen asegurou que esta estratexia nace "con vocación de continuidade" e co obxectivo de "minimizar impactos" para que "nada poña en risco o crecemento verde" do país, informa Efe.
O plan conta con 12,1 millóns de euros para 46 accións que empezarán a desenvolverse en abril. Foron seleccionadas tendo en conta "as zonas onde hai estudos que din que hai que actuar" prioritariamente.
No que se refire a Galicia, a actuación con maior orzamento é a protección duns 300 metros lineais de costa na praia de Armona, na Guarda, dotada con 140.000 metros. Na Coruña, a mellor dotada (con 49.453 euros) é a protección de noiros no acceso á praia de Lires (Cee), e en Lugo, a cimentación do dique da praia de Arealonga, en Foz (51.000 euros).
ACTUACIÓNS DE ADAPTACIÓN | GASTO 2015 |
PROVINCIA DA CORUÑA | |
Acondicionamento de noiros da praia do Vilar | 26.283,21 |
Estabilización da praia de Bestaruza | 19.630,77 |
Rexeneración dunar na praia de Baldaio | 3.608,89 |
Estabilización de noiros no paseo-senda de Caión | 6.627,53 |
Protección e estabilización do noiro no paseo de Malpica | 5.106,31 |
Protección e estabilización de noiros na senda de Cabana | 28.621,32 |
Protección de noiros no acceso á praia de Lires | 49.453,95 |
Protección de noiros na praia do Testal | 9.620,61 |
Protección e estabilización de noiros na praia de Tanxil | 21.027,73 |
Protección do noiro na praia de Arnela | 28.693,69 |
Estabilización de noiros e rexeneracion dunar nas praias de Carragueiros e Ladeira | 41.325,99 |
Total A Coruña | 240.000,00 |
PROVINCIA DE LUGO | |
Estabilización de canle de auga para evitar a erosión na praia de Portocelo. Xove | 6.500,00 |
Muro de contención de bordo para evitar a erosión do paseo no Torno, San Cibrao (Cervo) | 14.500,00 |
Reforzo da cimentación do dique da praia de Arealonga, Foz | 51.000,00 |
Protección do noiro da Vilavella, Ribadeo | 3.000,00 |
Total Lugo | 75.000,00 |
PROVINCIA DE PONTEVEDRA | |
Rexeneración da praia de Preguntoiro (Vilagarcía de Arousa) | 60.000,00 |
Protección duns 300 ml de costa na praia de Armona (A Guarda) | 140.000,00 |
Total Pontevedra | 200.000,00 |