O 58,3% dos graduados en universidades galegas no curso 2009-2010 traballa, e o 95 % deles en postos relacionados directamente coa súa titulación, segundo un estudo cuxo contido foi divulgado pola Xunta.
O documento, titulado Estudo da inserción laboral dos titulados no SUG 2009-2010, elaborado por unha axencia sobre calidade universitaria denominada Axencia para a Calidade do Sistema Universitario de Galicia (ACSUG), indica que do resto de graduados desa promoción, o 22,11 % continúa estudando e o 13,36 % presentouse a oposicións para conseguir un emprego público.
A análise abarca un total de 5.004 universitarios titulados das universidades galegas, o que representa o "56,08 % da poboación obxecto total", indica a Consellería de Educación e Ordenación Universitaria e calcula que pode haber un "un erro de mostraxe do 0,91 %".
Precisa que a mostra para o estudo estivo constituída por titulados universitarios en diplomaturas, licenciaturas, enxeñerías técnicas, enxeñerías, arquitecturas e arquitecturas técnicas do curso 2009-2010 que foron entrevistados por teléfono en decembro do ano 2012, dous anos logo de concluír eses estudos.
Os titulados de Ciencias da Saúde e de Enxeñería e Arquitectura son os que conseguen máis facilmente emprego, e os que continúan estudando son os que cursaron Artes, Humanidades ou Ciencias; mentres que os que se presentaron a oposicións son os de Ciencias Sociais e Xurídicas e os de Ciencias da Saúde.
Segundo a enquisa, o tempo medio para conseguir o primeiro emprego é de algo máis de cinco meses e medio para os estudantes que completaron a gradación de Enxeñería e Arquitectura e de algo máis de seis meses para os de Ciencias da Saúde, aínda que máis ou menos os graduados que conseguen traballo tardan oito meses en conseguilo.
En canto aos procedementos para atopar emprego, máis da metade dos enquisados destacaron os "contactos persoais, familiares ou amizades", condicionante seguido da "candidatura espontánea" a empresas, e, para rematar, da fórmula a través de Internet.
O conselleiro de Educación, Xesús Vázquez, afirmou que se trata dun estudo dun "órgano independente" e que a Xunta tratará de analizar "e valorar o informe".
O secretario xeral de Universidades da Xunta, José Alberto Díez de Castro, indicou acerca da axencia ACSUG que é "unha referencia no Estado" e considerou o informe como "un exercicio de transparencia".
O conselleiro de Educación, Xesús Vázquez Abad, dixo, preguntado con motivo dun acto informativo en Santiago convocado por outro motivo, que agora toca "estudar" este documento.
