Galicia rexistrou 622 raios durante os primeiros tres días de setembro, segundo Meteogalicia. Ademais, este martes caeron ao redor de 100.
A humidade do aire quente desde comezos de mes e o seu contacto cunha atmosfera inestable foron o desencadenamento das tormentas eléctricas, que descargaron un número de raios "habitual".
PREVISIÓN. Este mércores continuaremos nunha situación atmosférica de alta inestabilidade que levou a Meteogalicia a activar a alerta amarela por choivas intensas e tormentas nas zonas de montaña de Lugo e Ourense. A alerta estará vixente entre as 0 horas ata as 21.00 horas. En canto a Pontevedra e Ourense, espérase tamén que rexistren no mesmo tramo horario choivas moi fortes, que puntualmente poderían alcanzar os 15l/m2.
As temperaturas mínimas non terán cambios significativos, mentres que as máximas descenderán lixeiramente. Os ventos soprarán moderados do nordés, con intervalos fortes no litoral entre Bares e Fisterra.
►Temperaturas previstas para este mércores
A Coruña 19° 23° Ferrol 18° 23° Lugo 17° 21°
Ourense 18° 27° Pontevedra 17° 27° Santiago 17° 22°
Vigo 16° 2°
Finalmente, o xoves, Galicia queda nunha zona de transición entre o anticiclón situado ao norte de Azores e as baixas presións que se desprazan cara ao Mediterráneo. Así, na metade norte espéranse ceos nubrados con choivas no litoral e na metade sur os ceos alternarán nubes e claros, con chuvascos tormentosos á tarde na provincia de Ourense e sur da provincia de Pontevedra. As temperaturas mínimas sufrirán un lixeiro descenso mentres que as máximas quedarán sen cambios ou con lixeiros ascensos no sur. O vento soprará moderado do nordés.
►Temperaturas previstas para este xoves
A Coruña 17° 22° Ferrol 17° 23° Lugo 13° 21°
Ourense 16° 28° Pontevedra 16° 29° Santiago 16° 23°
Vigo 15° 29°
