Louzán declara ter sido "totalmente transparente" co aluguer dos baixos comerciais de Navia

O ex-presidente da Deputación de Pontevedra, Rafael Louzán, mostrouse "contento" e "satisfeito" tras declarar este martes no Xulgado de Instrución número 2 de Cambados en calidade de investigado por un presunto delito de suborno.

Louzán está a ser investigado polo caso aberto en relación coa compra e posterior aluguer con sobrecusto de dous baixos comerciais da súa propiedade na zona de Navia, en Vigo, ao concelleiro do PP en Pazos de Borbén e ex-deputado provincial, Severino Reguera.

O caso derívase dunha denuncia anónima presentada en 2013 tras terse feito pública a declaración de bens patrimoniais dos deputados provinciais, e que relaciona a Louzán e a súa muller co cobro dun prezo de aluguer de baixos comerciais moi por enriba do estipulado para outros inmobles similares nesa zona.

Louzán, que chegou ao xulgado en compañía do seu avogado uns minutos antes das catro da tarde, sinalou diante do xuíz que este proceso de aluguer foi "totalmente transparente" e achegou numerosos documentos sobre esta transacción comercial.

O dirixente popular, tras comparecer ante o titular do xulgado cambadés tres horas logo da súa chegada á sede xudicial, explicou que este é un asunto "privado", que estes alugueres son a "única actividade comercial" que ten e que está "absolutamente regulada".

O ex-presidente da Deputación de Pontevedra asegurou que os alugueres destes dous locais comerciais acordáronse con Severino Reguera baixo uns prezos "perfectamente estipulados", acordes cos alugueres que se están pagando na zona.

Para iso, detallou, presentouse ante o xuíz contratos doutros locais do barrio para demostrar "que prezos se manexan na mesma rúa" e senllos informes dunha inmobiliaria e unha tasadora que "avalan" os prezos que cobra Louzán polos dous baixos.

Louzán reiterou que "baixo ningún concepto" ningún dos tres investigados nesta causa se "beneficiaron de nada" e insistiu en que non existen tales sobreprezos e que "ninguén levou nada".

O feito de ser unha denuncia anónima o que provocou esta investigación fai sospeitar a Louzán que "seguramente" detrás deste procedemento hai un "interese político" para intentar "danar" a súa imaxe.

Ademais, o aínda presidente do PP de Pontevedra quixo aclarar que solicitou aprazar a súa anterior citación —prevista para o pasado martes— ao atoparse de viaxe.

"Citóuseme un venres ás dúas da tarde para o luns e eu non estaba aquí, estaba fóra", sinalou o dirixente popular, que recordou que se presentou ante o xuíz "sempre" que o citaron, xa que asegura que este caso está "perfectamente claro" e que posúe "todos os datos e toda a documentación" para explicar este asunto.

Louzán tamén é investigado na operación Patos sobre supostas irregularidades en contratacións públicas en diversas administracións públicas de Galicia.