A Garda Civil xa restableceu o tráfico no tramo da OU-411 que tivo que ser cortado a tarde do venres como consecuencia dun incendio forestal que arrasaba o monte de varias parroquias do Concello de Padrenda (Ourense).
A pesar de que o intenso fume obrigou a cortar durante toda a tarde do venres a circulación desta vía entre Padrenda e bande, ao seu paso polo lugar de Frea, o traballo dos equipos de extinción permitiron que á primeira hora do sábado se puidese volver á normalidade.
Tras extinguir as lapas, que arrasaron no seu maior parte monte raso, os técnicos valorarán agora as consecuencias do incendio que, segundo fontes oficiais, podería ser intencionado. Segundo as primeiras estimacións, a superficie queimada podería alcanzar as 200 hectáreas.
Intencionado
O lume orixinouse nun monte do Concello do Mato, preto da 'raia' con Portugal. Dada a magnitude das lapas, os equipos de emerxencia tiveron que desaloxar dúas parroquias do municipio ouresano de Padrenda.
Aínda que polo momento os técnicos non puideron avaliar as causas do sinistro, todo parece apuntar a que se trata dun lume intencionado.
Segundo apuntaba o Director Xeral de Montes en funcións, Alberto Branco, en declaracións á Radio Galega, o incendio ''foi claramente intencionado'', probablemente consecuencia dunha queima incontrolada de restrollos en zona de monte raso, que constitúe o 70% da superficie queimada.
Oito brigadas terrestres, cinco helicópteros, tres avionetas e un hidroaión traballaron durante toda a noite para extinguir o lume.
