Os autónomos galegos foron os que pecharon 2015 cunha pensión máis baixa de toda España, con 543 euros de media, segundo a análise realizada pola federación de organizacións de profesionais, autónomos e emprendedores (Opa) a partir dos datos da Seguridade Social do último mes do pasado ano.
De acordo con esta organización, os autónomos acabaron o pasado exercicio cobrando un 36,9% menos de pensión que os traballadores do réxime xeral. En concreto, a pensión media do colectivo de autónomos ao pechar o ano 2015 foi de 623,42 euros, fronte aos 988,82 euros dos traballadores do réxime xeral.
Doutra banda, para as pensións por xubilación as diferenzas amplíanse ata o 41%, xa que os autónomos pensionistas cobraron 692 euros de media, mentres que os asalariados recibiron 1.174 euros.
No que respecta ás pensións por viuvez, os autónomos cobraron de media 470 euros, fronte aos 672 que percibiron os traballadores que estiveron no Réxime Xeral.
Así pois, o presidente nacional de Opa, Camilo Abiétar, incidiu na necesidade de que se reduzan estas diferenzas e solicitou ao futuro goberno de España que estableza as medidas necesarias para mellorar as pensións dos traballadores autónomos. "Desde Opa recomendamos aos autónomos que, na medida das súas posibilidades, coticen a achega máxima porque, a longo prazo, redundará positivamente na pensión que van recibir cando deixen de exercer a súa actividade", engadiu Abiétar.
A PENSIÓN DOS AUTÓNOMOS, UN 27,8% MAIOR Á DAS AUTÓNOMAS. Por xéneros, dentro do réxime especial de traballadores autónomos (Reta), a pensión media dos homes autónomos foi de 733,43 euros, un 27,8% superior á pensión media das mulleres autónomas, quen recibiron 529,54 euros.
Por comunidades, País Vasco é onde os traballadores autónomos recibiron a pensión máis alta de todo o país, 730 euros ao mes. A pesar diso, esta cifra está por baixo dos 1.255 euros que cobraron de media os pensionistas do réxime xeral nesta comunidade, o que representa unha diferenza de case o 42%.
Ao lado contrario, Galicia, con 543 euros de media, é onde os autónomos tiveron a pensión máis baixa de toda España e Asturias é onde se percibe a diferenza máis notable, xa que os pensionistas autónomos recibiron unha media de 596 euros ao mes, un 48% inferior á media dos asalariados do réxime xeral desta comunidade, que é de 1.145 euros.
No outro extremo sitúase Estremadura onde os pensionistas do réxime xeral recibiron 796 euros ao mes, fronte aos 608 euros que obtiveron os pensionistas autónomos, o que supón unha diferenza do 23,6%.
Os autónomos galegos tiveron a pensión máis baixa de toda España en 2015
Estes profesionais cobraron un 36,9% menos o pasado exercicio que os traballadores do réxime xeral, segundo a Opa. Os homes cobran de media un 27,8% máis que as mulleres
