Os trens Alvia que conectan Galicia con Madrid gañaron 95.300 usuarios entre os meses de febreiro e xuño deste ano, o que supón un aumento do 34 por cento respecto ao mesmo período do ano anterior e eleva o número total de viaxeiros ata os 373.600, indica Renfe nun comunicado.
A compañía indica que este incremento de pasaxeiros coincide coa mellora dos servizos tras a posta en marcha, o 1 de febreiro, do tramo de 98 quilómetros de vía de altas prestacións entre Olmedo (Valladolid) e Zamora.
Co Plan Galicia 2016 reducíronse os tempos de viaxe no traxecto con Madrid entre vinte e cinco e trinta minutos, ao mesmo tempo que se incrementou o número de frecuencias dos trens e as oportunidades de viaxe ao longo do día en ambos os sentidos, sinala o operador ferroviario.
Un total de 66.700 viaxeiros punto a punto utilizaron o servizo en Ourense, 70.000 en Santiago de Compostela, 50.000 na Coruña, 37.700 en Vigo, 17.300 en Pontevedra, 8.300 en Ferrol e 4.800 en Lugo, segundo detalla Renfe na súa nota.
Os Alvia que conectan Galicia con Madrid gañan 95.300 usuarios entre febreiro e xuño
A redución de tempo nos traxectos e o aumento de oferta nos horarios son os principais motivos do incremento no número de viaxeiros
