Máis de 60 anos levaba vivindo unha familia de Peralto, no Grove, cunha bomba na súa horta. Non sabían o que era e incluso a movían dun sitio para outro con total tranquilidade e a empregaban de contrapeso para un limoeiro.
Foi o seu fillo, Manuel Iglesias, quen alertou á Garda Civil hai uns días. Pensaba que os seus pais se desfixeran do obxecto, ata que volveu velo na leira.
Os artificieiros da Garda Civil, desprazados desde Pontevedra, retirárona esta semana, para o que tiveron que acordoar a zona e desaloxar a algúns veciños, entre gran expectación. A bomba, que probablemente datase da Guerra Civil, tiña metralla no seu interior.
"Os meus pais non sabían o que era e movíano de lado a lado na terra e ata chegaron a poñela no limoeiro para que fixera de contrapeso", explicaba este xoves Manuel Iglesias en declaracións á TVG. A bomba levaba con eles desde que se fixeron, hai sesenta anos, con ese terreo adxacente á súa casa. Pero quen sabe o tempo que levaría alí, co perigo que iso supuña.
