As pensións subiron un 1,9% en Galicia nun ano

A nómina mensual media sitúase este mes na comunidade en 764,17 euros

A pensión media en Galicia é de 764,17 euros, cun crecemento do 1,9% en relación co mes de agosto de 2015.

O número de pensións en Galicia situouse en agosto en 755.378, o que representa un incremento do 0,6% con respecto ao mesmo mes do ano anterior, segundo datos do Instituto Nacional de Seguridad Social do Ministerio de Empleo y Seguridad Social.


A cifra total de pensións contributivas en España elévase a 9.427.785, un 1,29% máis respecto ao ano pasado.

Máis da metade, 5.744.786 concretamente, son por xubilación; 2.359.879 corresponden a viuvez, 940.730 a incapacidade permanente, 342.486 a orfandade, e 39.904 a favor de familiares.

A nómina mensual de pensións contributivas da Seguridade Social alcanzou os 8.534,97 millóns de euros o pasado 1 de agosto. O incremento mensual foi de 3,2%.

A pensión media de xubilación alcanzou os 1.044,92 euros, o que representa un incremento anual do 2,09%.

En canto á pensión media do Sistema, que comprende as distintas clases (xubilación, incapacidade permanente, viuvez, orfandade e a favor de familiares), situouse en 905,30 euros, o que supón un aumento interanual do 1,89%.

Comentarios