La Vuelta Ciclista a España 2016 sairá da provincia de Ourense "posiblemente" cunha contrarreloxo por equipos e a idea de que a carreira teña protagonismo con cinco etapas que transitarán polas catro provincias galegas, segundo desvelou en Medina del Campo o director de La Vuelta, Javier Guillén.
A organización vinculará a saída da primeira etapa ás augas termais da provincia de Ourense, pero aínda se deberá concretar o punto exacto do lanzamento da carreira, que será xunto a un balneario, segundo explicou Guillén.
Ao anuncio do lanzamento de La Vuelta 2016 celebrado antes da saída da decimonovena etapa entre Medina del Campo e Ávila, asistiron xunto a Guillén o presidente da Deputación de Ourense, Manuel Baltar, e a directora xeral de Turismo da Xunta de Galicia, Nava Castro.
La Vuelta regresa a Galicia para o seu lanzamento, como xa ocorreu en 2013 cando o fixo en Vilanova de Arousa. É unha Comunidade, a galega, que tivo protagonismo nas últimas edicións da rolda española con etapas que quedaron gravadas entre a afección, como a que tivo lugar en Ézaro en 2012. Aquel ano Galicia albergou catro etapas íntegras polo seu territorio.
A Costa da Morte tamén deixou o seu selo en 2013 coa etapa de Fisterra, na que se impuxo o español Dani Moreno e o italiano Vincenzo Nibali colocouse líder. Esta zona "máxica" podería ser de novo un punto crave de interese.
La Vuelta Ciclista 2016 sairá de Ourense
A carreira arrincará "posiblemente" cunha contrarreloxo por equipos e a idea é que ata cinco etapas transiten polas catro provincias galegas, segundo desvelou en Medina del Campo o seu director, Javier Guillén