A maioría do PP impediu a aprobación dunha iniciativa socialista que pretendía, entre outros asuntos, incrementar os medios para axilizar a arbitraxe aos afectados polas participacións preferentes.
Durante a sesión do Parlamento galego, o PP votou en contra desta proposta da socialista Carmen Gallego, ao rexeitar esta unha emenda que presentaran os populares á súa moción.
Gallego sostivo que os populares teñen un "problema ideolóxico" que lles impide defender ás persoas humildes afectadas por esta "estafa", ás que aplica a política "do pau", mentres defende "aos poderosos".
Pola súa banda, o líder de Alternativa Galega de Esquerda, Xosé Manuel Beiras, recordou que recentemente se reuniu con afectados e indicou que calquera que teña un pouco de sensibilidade "sae esnaquizado" deste encontro.
Tras pór o exemplo dunha muller que traballou de redeira toda a súa vida ou un home que facía nasas para o marisco e, unha vez xubilado, os seus aforros quedaron atrapados nas preferentes, espetou: "un ponse no seu sitio e, digo a verdade, francamente, eu póñome e collo un pau, doulle na cabeza e despois, que me metan no cárcere: franqueza absoluta, non sería capaz de reprimirme".
O nacionalista Francisco Jorquera dixo non querer reabrir a polémica establecida nun pasado pleno por afectados polas preferentes, pero citou casos dramáticos coma o dun home ao que lle foi expropiado o seu restaurante por unhas obras do AVE e ten atrapados os seus aforros ou unha muller emigrada a Suíza que non pode axudar aos seus fillos en paro polo mesmo motivo, o que crea desesperación neste colectivo.
Mentres, a popular Herminia Pouso afirmou de Carmen Gallego que hai que ter "atrevemento" para falar do abandono de funcións do actual Goberno tendo en conta, subliñou, que o problema se arrastra desde hai anos, cando gobernaba o PSOE no Estado.
Ademais, reprochou ao BNG que "aplaudise" as ameazas proferidas no pleno, subliñou, por un grupo de afectados nun pleno pasado, cando se chegou a ouvir que habería ríos de sangue.
Ademais, insistiu neste sentido que o PP mantivo contactos cos afectados para buscar unha solución ao problema.
Para a parlamentaria popular, o procedemento da arbitraxe impulsado pola Xunta constitúe unha solución "áxil, rápida e gratuíta para os afectados", dixo, e insistiu en que no Executivo galego "non escatimamos medios materiais nin humanos" para atender demandas que sexan aceptas pola entidade financeira.
Por outra banda, o PP rexeitou tamén unha proposta do deputado de AGE Xabier Ron que reclamaba o incremento da partida orzamentaria destinada á Real Academia Galega, ao argumentar o deputado popular Agustín Baamonde que grazas ao compromiso do presidente da Xunta, Alberto Núñez Feijóo, xa figura así nos orzamentos.
Ron cualificou de "grave" que o Goberno central recortase os orzamentos para esta institución centenaria, pero máis grave, asegurou, é que tamén "recorte" o Executivo galego, xa que a achega á institución non chega para atender todos os labores da RAG.
