Os oito detidos pola retención do empresario galego do sector da madeira continuarán en prisión comunicada e sen fianza imputados por un delito de secuestro e, algúns deles, sen especificar, por tenencia ilícita de armas, informou o Tribunal Superior de Xustiza de Galicia.
A maxistrada do Xulgado de Primeira Instancia e Instrución número un da localidade coruñesa de Betanzos acordou que os oito imputados permanezan en prisión comunicada e sen fianza.
A todos se lles imputa un delito de secuestro e a algúns, "polo momento non se pode precisar a cantos", sinala o TSXG, outro de tenencia ilícita de armas tras prestar declaración dúas veces e levantar o segredo das actuacións.
No exterior da sede xudicial o suposto xefe, Jesús Mejuto, asegurou que non se trataba dun secuestro, pois era unha simple represalia por unha madeira que lle roubaron ao seu pai.
Ademais, o propietario da casa da localidade pontevedresa de Lalín onde este empresario estivo secuestrado entre o sábado 18 e o venres 24 nun habitáculo para a ceba de porcos subliñou que nin el nin a súa muller, pais da noiva de Mejuto, sabían que había unha persoa retida en contra da súa vontade.
O maderista Abel Diéguez Neira, vítima neste caso, rompeu o seu silencio nunha entrevista cun xornal coruñés na que comenta que os secuestradores buscaban o seu irmán cando lle tenderon unha emboscada preto de Betanzos.
No traxecto ata Lalín logrou abrir dúas veces o maleteiro do coche no que o levaban atado, ata que un dos secuestradores golpeouno ata case matalo e non quedaron ganas de volver intentalo.
O diario Faro de Vigo publica que a familia do empresario debía 16.000 euros aos seus captadores e que un xuíz condenou en 2012 a firma Dieda Forestal a pagar 12.000 euros e intereses ao pai dos irmáns Mejuto.
