A familia da pontevedresa Sonia Igrexas, de cuxa desaparición se cumprirán catro anos o próximo 18 de agosto, recorrerá a decisión xudicial de arquivar a causa contra o único imputado, Julio Araújo, o seu compañeiro sentimental e pai do seu fillo. Paralelamente, iniciará tamén os trámites para solicitar a declaración de ausencia -en protección dos bens e dereitos da desaparecida-, unha xestión que atrasaran por tratarse dunha decisión "dolorosa".
En declaracións a Europa Press recollidas en informacións do portal web da axencia, a irmá da muller desaparecida, Mari Carmen Iglesias, asegurou que os seus achegados están "impactados" ante a comunicación dun auto xudicial que non esperaban que se producise en pleno mes de agosto e que os pillou por sorpresa".
No entanto, Mari Carmen Iglesias admitiu que o sobresemento da causa contra Julio Araújo "entraba dentro das posibilidades e era algo que por desgraza se temía", engadiu.
A avogada da familia estudará este luns o contido do auto, asinado polo Xulgado de Violencia sobre a Muller de Pontevedra, para xustificar o seu recurso e presentalo no prazo estipulado.
