A renuncia ao escano anunciada polo deputado de Alternativa Galega de Esquerda David Fernández Calviño para retomar a súa carreira investigadora orixinou certas friccións no seo da coalición AGE, que agrupa aos nacionalistas Anova e a Esquerda Unida (EU).
A seguinte na lista sería Carmen Iglesias Sueiro, de EU, pero os plans do grupo parlamentario consistían en que correse a lista e entrase a irmandiña Iolanda Pérez para manter a equidade das dúas patas da coalición.
Con todo, Iglesias Sueiro expresou a súa intención de quedar coa acta. Isto provocou que o grupo parlamentario e, especialmente, Esquerda Unida, lle pedira a Fernández Calviño que "non deixe a acta" por agora. "É a orde que teño neste momento", recoñeceu o deputado de AGE.
Pola súa banda, a líder de EU, Yolanda Díaz desvinculou a situación dunha crise no seo da coalición cos de Xosé Manuel Beiras. "Non hai crise na coalición, hai un problema persoal que afecta a unha organización política", manifestou.
A coalición de AGE, que conseguiu nas eleccións galegas 200.000 votos e nove escanos colocándose como terceira forza, e que conta con enquisas favorables para futuros comicios, ten actualmente no Parlamento cinco deputados de Esquerda Unida e catro de Anova, a organización que lidera Xosé Manuel Beiras. Se finalmente accedese Iglesias Sueiro, a formación nacionalista quedaría con tres escanos, o que lle fai perder representación.
Amparada pola lei electoral
Neste contexto, a renuncia de Fernández Calviño e a falta de disposición de Iglesias Sueiro a deixar o seu posto abre unha nova situación na que Esquerda Unida, segundo declarou Yolanda Díaz, está disposta a facer "cumprir os estatutos" da organización, ratificados na asemblea de abril deste ano, nos que a organización se reserva a pertenza das actas dos cargos electos.
Pero para Carmen Iglesias Sueiro, a súa decisión de non deixar correr a lista "mantense" e anuncia que collerá a acta e traballará "no Parlamento galego para a esquerda e para a causa".
"O que digo é que iso vai a misa; non vou renunciar á acta de deputada", afirmou Iglesias Sueiro, quen está avalada pola lei electoral, a cal, en reiteradas ocasións, a propia EU pediu modificar co fin de que as actas conseguidas pertenzan ás organizacións políticas para evitar, entre outras cuestións, situacións de transfuguismo.
Iglesias Sueiro indicou que irá actuando "en función das circunstancias" e advertiu de que ela asumirá a acta "en AGE ou como independente", pero "por suposto" que non renunciará ao seu escano.
Respectar aos votantes
Yolanda Díaz apela ao cumprimento dos "intereses colectivos" e, aínda que recoñece que EU "non pode facer nada legalmente", xulgou que as cuestións persoais "non poden someter e contraatacar os intereses colectivos". Neste sentido, avisou de que os votantes de AGE dixeron "si á correlación de forzas", a cal se vai "respectar".
O Consello Nacional de EU reunirase este sábado para avaliar a situación.
Pola súa parte, o deputado ourensán de Toén sinalou que "non é desexable" para el ter que marcharse para o país escandinavo en posesión da súa acta, xa que "sería moi difícil" compaxinar ambas as tarefas. Con todo, recoñeceu que "non é unha decisión individual, senón colectiva" e atenderá o que diga o seu grupo.
