A Audiencia Provincial da Coruña desestimou un recurso da defensa do autor confeso do roubo do Códice Calixtino, Manuel Fernández, sobre a validez de determinadas probas realizadas, por entender que non é o momento procesual oportuno para cuestionalas.
En concreto, o tribunal explica que o recurso se refería á identificación de chaves e documentación incautada, así como o rexistro no vehículo e as gravacións das cámaras de seguridade e conclúe que non hai causa de indefensión e que o momento de cuestionar estes extremos será no acto de xuízo.
A posible nulidade desas resolucións (do xuíz instrutor) e das dilixencias nelas acordadas por producir unha vulneración de dereitos fundamentais debe adoptarse no momento procesual previsto especificamente para iso, explica.
O auto da Audiencia detalla caso por caso as referencias do recurso e insiste en que é preciso confirmar a decisión do xuíz instrutor.
