Quen se desprazaban pola A-6 desde A Coruña e a súa área de influencia en dirección Lugo e Madrid o sábado sobre as 18.00 horas á altura de Coirós correron grave perigo por mor dun veciño de Betanzos que conducía ebrio por estes carrís pero en sentido contrario, é dicir, en dirección á urbe herculina. Afortunadamente, e "grazas á rápida resposta cidadá", explica a Garda Civil, non houbo que lamentar ningunha colisión, o que ás elevadas velocidades da autovía podería ter resultado fatal.
A alarma saltou ao redor das 18.10, cando a central da Garda Civil de Tráfico recibiu varias chamadas que alertaron de que un Fonda Accord gris circulaba en dirección contraria polos carriis que levan a Lugo da A-6, moi preto da área de servizo de Coirós, na provincia da Coruña.
O instituto armado despregou entón un dispositivo para dar caza ao infractor, que frutificou poucos minutos despois ao darlle o alto ao condutor kamikaze, que obedeceu en todo momento aos axentes e botouse á beiravía tras endereitar previamente o rumbo.
Ao baixar o portelo, os uniformados caeron na conta de que o coñecían "por ter protagonizado diversos feitos da mesma índole". Así mesmo, tal e como sospeitaban, constataron que carece de permiso de conducir. E do mesmo xeito, a tenor do forte a cheiro a alcol que desprendía, fixéronlle a proba de etilómetro e esta cuadruplicó os rexistros legais: 1,06 miligramos por litro en aire expirado. Acúsaselle de tres delitos contra a seguridade viaria.
