O Concello de Pontedeume investiga un posible caso de malos tratos a un gato ferido por parte dun membro da Policía Local, reflectido nun vídeo publicado en redes sociais. A escena foi captada por alumnos dun instituto do municipio, que viron o axente apartando co pé o animal cando saían en autobús do centro escolar. Tratábase dunha cría que fora atropelada.
A asociación animalista Libera! denunciou que as imaxes divulgadas confirman que o policía "aparta un gato vivo a patadas" e esixe ao consistorio "unha investigación exhaustiva". Critica que o home non recollese o animal e o trasladase de forma inmediata a unha clínica veterinaria para que lle fose prestada axuda profesional.
"En lugar de tomar medidas para evitar o sufrimento do gatiño, o individuo afastouno da vía pública de formas moi cuestionables", censura Libera!, que reclama a apertura dun expediente ao axente. Solicita, ademais, que se lle impoña a obrigación de asistir "a cursos sobre benestar animal e normativa" vixente.
O Goberno municipal indica pola súa banda que a súa intención é "que non se repita un feito deste tipo" no caso de que se probe a veracidade da denuncia. Polo momento, púxose en contacto co policía e coa xefatura do corpo para "aclarar o acontecido e, de ser necesario, tomar as medidas e accións oportunas".
