A Policía Xudicial da Garda Civil de Noia prosegue a investigación para esclarecer a morte por afogamento dun neno de 11 anos, alumno do Ceip Fogar de Carballo, no encoro da Fervenza no municipio de Mazaricos durante unha excusión escolar. Os investigadores procederon a tomar declaración aos menores que estaban na actividade, acompañados dos seus pais, e a completar a reportaxe fotográfica co fin de engadilo ao ateigado.
O menor, chamado Carlos, que cursaba sexto de primaria, faleceu no mediodía tras desaparecer na auga na zona do encoro. As investigacións apuntan a un accidente, ao quedar atrapado no lodo nun pozo natural.
Unha vez finalizadas as dilixencias de investigación e concluído o ateigado co ditame da Garda Civil, será remitido ao Xulgado de Instrución Número 1 de Muros, que leva a causa. Durante a excursión dun grupo de escolares do Ceip Fogar de Carballo, un grupo de mozos, "con permiso para bañarse", metéronse na auga na zona do encoro da Fervenza e un deles "durante 20 minutos faltou", polo que se avisou aos servizos de urxencias, indicaron fontes próximas á investigación consultadas.
ACCIDENTE. Ata o lugar desprazáronse diferentes patrullas da Garda Civil, bombeiros e servizos sanitarios, que posteriormente lograron recuperar o corpo sen vida do encoro —dun pozo natural de varios metros de profundidade— e, a pesar dos esforzos do persoal sanitario, non conseguiron reanimalo.
As pescudas proseguen para esclarecer o sucedido durante o desenvolvemento das actividades organizadas polo citado centro educativo cando un grupo dos escolares foi a bañarse.
TRES DÍAS DE LOITO. O Ceip Fogar de Carballo decretou tres días de loito oficial pola morte do pequeno, polo que a actividade no centro quedou suspendida desde este mércores e ata o venres, informan fontes do Concello.
Tras o suceso, responsables da Consellería de Cultura, Educación e Universidade reuníronse con membros do colexio e co alcalde de Carballo, Evencio Ferreiro, nun encontro no que decretaron tres días de loito.
O rexedor expresou a súa "dor" e trasladou o "apoio" á familia e a toda a comunidade educativa do Ceip Fogar "en días durísimos". Desde a Concellaría de Igualdade e Benestar ponse o programa Concilia a disposición das familias que o necesiten.
A Policía Xudicial da Garda Civil encárgase da investigación.
