A Garda Civil interveu varios instrumentos preparados para a caza furtiva de animais na localidade coruñesa de Touro, onde identificou a dúas persoas como supostos autores da súa colocación.
Segundo informou este venres o instituto armado, axentes do Seprona de Santiago localizaron o mércores, nunha leira da citada poboación, diferentes artes ilegais de caza que incluían unha garduñeira, varios lazos e unha gaiola, e que se atopaban dispostos para a caza furtiva de animais.
A Garda Civil identificou a dúas persoas, veciñas de Arzúa e Touro, como presuntos autores da súa colocación. Os dous atopábanse no lugar dos feitos, onde foron intervidos os artefactos.
Do feito deuse conta á Consellería de Medio Ambiente, ao tratarse dunha infracción á Lei de Caza de Galicia.