Interceptan un turismo na AP-9 con máis de 800 quilos de peixe e marisco

A Garda Civil interceptou na AP-9, á altura da peaxe de Padrón, un turismo cun remolque lixeiro que transportaba máis de 800 quilos de peixe e de marisco, tanto fresco como conxelado, de procedencia ilícita, segundo informan fontes do instituto armado. Nun comunicado, detallan que o comiso consistiu en 148 quilos de peixe fresco —raia, rapante e pescada— contido en sacos de plástico e 656 quilos de produtos conxelados de varias especies, entre eles 411 de vieira.

Segundo os propietarios, o peixe e o marisco procedían dun barco de bandeira francesa que desembarcara no porto de Ribeira.

Os feitos foron postos en coñecemento da Subdirección Xeral de Gardacostas de Galicia, cuxos funcionarios, tras constatar que os propietarios dos produtos non podían acreditar a súa lícita procedencia, acordaron o seu comiso e a incautación do remolque no que eran transportados. O peixe comisado foi entregado en centros benéficos e a vieira destruída, porque o remolque non tiña ningún tipo de sistema de conservación de frío, o que podería supor un risco para a saúde dos posibles consumidores.

O vehículo que arrastraba o remolque estaba destinado ao transporte público de viaxeiros e carecía de autorización para o transporte de mercancías, polo que foi denunciado por infracción á lexislación de transportes terrestres.