O xerente da inmobiliaria que puxo á venda o Pazo de Meirás, Antonio Avilés, asegurou que "todos" os irmáns fillos de Carmen Franco, que faleceu o pasado mes de decembro, están de acordo en desfacerse da vivenda situada no municipio coruñés de Sada. Dúas comisións impulsadas pola Deputación da Coruña e a Xunta buscan, pola súa banda, conseguir incorporar para o patrimonio público as coñecidas como Torres de Meirás.
En declaracións a Europa Press, o xerente de Mikeli Luxury Real, que é de orixe galega, recoñeceu que o balbordo social apoiado polo compromiso político pode "dificultar" a venda porque "hai xente que non quere problemas", á marxe de que, en xeral, "fácil de vender non é nada".
Antonio Avilés explicou que a súa inmobiliaria se dedica "exclusivamente á venda deste tipo de inmobles", que poden ser "ou ben para alguén que os queira para uso persoal ou como hotel ou centro de restauración", e mostrou a súa "satisfacción" por poder encargarse deste pazo.
SADAMAIORÍA. A formación SadaMaioría cualificou de "urxente" presentar unha acción de nulidade contra o título de propiedade do Pazo de Meirás, á vez que reclama "unidade de acción" para que o edificio deixe de estar en mans da familia Franco. Nun comunicado, e tras facerse pública a inclusión do inmoble nunha inmobiliaria cántabra para a súa venda, esta formación demanda a presentación "inmediata" da vía xudicial civil, a acción de nulidade, contra o título da propiedade do Franco, "así como a correspondente anotación preventiva no Rexistro da Propiedade".
ROMÁN RODRÍGUEZ. O conselleiro de Cultura, Román Rodríguez, lembrou este venres que a familia Franco ten a obrigación de comunicar á Xunta cando "exista un hipotético comprador" para o Pazo de Meirás e apostou por "non caer na trampa" para que "Galicia desembolse recursos" por este ben. A familia propietaria, os Franco, teñen "a obrigación de que, cando teñan un hipotético comprador, comunicarllo á Xunta, que ten a posibilidade de exercer o dereito de tenteo", isto é, a compra preferente polo mesmo prezo.
No entanto, o conselleiro reiterou que a Administración galega descarta esta opción, dado que hai un "mandato parlamentario" que "reflicte a vontade dos galegos" de que este Ben de Interese Cultural "pase a ser propiedade pública sen desembolsar ningún recurso económico". "Non imos exercer o dereito de retracto, pero si imos pelexar desde o punto de vista xurídico e legal para que este ben pase a patrimonio público", sentenciou Román Rodríguez, que reiterou que a Xunta "non vai transferir nin un só euro aos propietarios actuais".
Tras lembrar que un "hipotético comprador" debe "saber que este ben ten moitas limitacións en canto ao seu uso", o conselleiro apostou por "non caer na trampa nin en hipotéticas estratexias encamiñadas a que Galicia desembolse recursos" por este monumento.
