A Garda Civil de Carballo e o Equipo Roca da Garda Civil de Vimianzo, ambas as localidades na provincia da Coruña, procederon á detención dun matrimonio dedicado á venda de droga e ao que lle incautaron 261 gramos de cocaína. Tras o seu pase a disposición xudicial, xa ingresaron en prisión sen fianza.
A investigación iniciouse en marzo cando a Garda Civil tivo coñecemento de que persoas do mesmo grupo familiar da localidade coruñesa de Camariñas poderían dedicarse á venda ou distribución de sustancias estupefacientes.
Coordinada polo xulgado de Primeira Instancia e Instrución 2 de Corcubión, o operativo policial, denominado 'Operación Encaixe' centrouse en determinar que o matrimonio tiña como principal forma de vida e de ingresos a venda de drogas, non só en Camariñas, senón tamén en localidades limítrofes como Cee, Corcubión e Carballo, chegando incluso á Coruña.
O 20 de setembro, o home e a muller investigados, D.P. e T.M., foron observados pola Garda Civil xusto cando realizaban unha transacción consistente en cómpraa-venda de sustancia estupefaciente na Coruña, polo que foron detidos nese mesmo momento. A sustancia estupefaciente foi intervida e investígase tamén ao comprador.
O venres 21, tras obter a preceptiva autorización de entrada e rexistro no domicilio de ambos no lugar de Mourin, en Camariñas, os axentes incautaron un total de 261 gramos de cocaína na vivenda. No mercado, a Garda Civil estima que a droga alcanzaría os 15.453 euros. Tamén se interviñeron 4.120 euros en efectivo, un vehículo, catro teléfonos móbiles, unha báscula e unha máquina de envasado, así como diversa documentación.
O Xulgado xa decretou o ingreso en prisión sen fianza dos detidos. A Operación continúa aberta e non se descartan máis detencións nos próximos días.
Na investigación interviñeron a Garda Civil do Posto da Garda Civil de Camariñas, a Policía Local de Camariñas, USECIC da Comandancia da Garda Civil da Coruña e a Unidade Canina de detección drogas da Comandancia da Civil de Pontevedra.
