Os establecementos de hostalería en Galicia quedarán divididos en dous niveis de seguridade independentemente da situación sanitaria do municipio no que se atopen. Serán os propios establecementos os que decidan baixo que nivel de condicións de seguridade traballan, se no medio ou no máximo, que permitirá maior aforamento e outras cuestións como recuperar o uso da barra.
Estas foron algunhas das claves ofrecidas polo vicepresidente primeiro da Xunta, Alfonso Rueda, e o conselleiro de Sanidade, Julio García Comesaña, sobre o protocolo pactado co sector da hostalería e que agora deberá ser referendado polo comité clínico que asesora á Administración autonómica na reunión deste martes.
Os responsables autonómicos apelaron a que o documento conte co referendo do grupo de expertos antes de desvelar os detalles do novo protocolo, aínda que apuntaron algúns detalles, como a articulación de dous niveis de seguridade en toda Galicia.
En cada nivel rexerán unha serie de obrigas e medidas sanitarias que permitirán aos establecementos funcionar con independencia da situación epidemiolóxica do municipio, aínda que se prevé a posibilidade de adoptar medidas conxuntas en caso de empeoramentos severos do contexto sanitario ou cando se detecten gromos asociados á hostalería. A idea da Xunta é que o novo protocolo, no caso de que o comité clínico dea o seu visto e prace, entre en funcionamento este mesmo mes de setembro.
Serán os negocios os que elixan baixo que condicións operarán
Ademais, o Executivo galego avanzou que se atopa en conversas co sector para elaborar un novo marco normativo para o lecer nocturno co horizonte de que estea listo no mes de outubro. A posibilidade de prolongar o horario de funcionamento destes locais está sobre a mesa.
"MEDIDAS XA EN FUNCIONAMENTO". Tanto Rueda como Comesaña quixeron ser cautos á hora de avanzar os contidos do protocolo antes de que o documento chegue ao comité clínico deste martes, aínda que puntualizaron que a "maioría" de medidas que contemplan os dous niveis "están xa en funcionamento".
A principal característica do novo marco é que serán os negocios os que elixan baixo que condicións operarán: se as establecidas no nivel máximo de seguridade ou no medio. O primeiro implicará unha serie de requisitos que permitirán empregar as barras ou aumentar o aforamento, mentres que os establecementos que queden no segundo inferior terán máis limitadas as súas capacidades.
En todo caso, Alfonso Rueda quixo incidir en que "todos os locais" terán "seguridade sanitaria" con independencia do nivel ao que se acollan. Ademais, defendeu que operar dentro do baremo de seguridade máxima non implicará desembolsos adicionais para os negocios porque "a maioría de medidas a esixir xa están implantadas".
O número dous do Executivo galego e o titular de Sanidade puxeron o acento en que o documento foi "moi consensuado" e nace con vocación de permanencia para dotar dun "marco estable" o sector da hostalería.
O último dos encontros cos representantes do sector foi, precisamente, na mañá deste martes, cando a Xunta asinou o borrador do novo protocolo coas catro asociacións de hostalería provinciais e o Clúster de Turismo.
A Xunta buscará tamén un protocolo para o lecer nocturno
Segundo Rueda, que agradeceu a "paciencia", "comprensión" e o "alto grao de cumprimento" das medidas por parte do sector durante a crise sanitaria, o documento que previsiblemente aprobará o comité clínico é un "documento pioneiro en toda España que probablemente vai ser seguido e imitado noutros territorios".
LECER NOCTURNO. "Estamos moi contentos de chegar a este documento", remarcou o número dous da Xunta, que tamén sinalou a necesidade de adoptar decisións sobre o lecer nocturno para que, do mesmo xeito que a hostalería convencional, dispoñan dun "marco estable" con independencia da situación sanitaria.
E é que, tras a firma do acordo para a hostalería, Rueda e Comesaña mantiveron outro encontro, neste caso con representantes do lecer nocturno, para establecer as bases de cara á elaboración dun novo protocolo que queren ter listo antes de que conclúa setembro.
"Imos ver se somos capaces de chegar a un acordo este mes e que o último trimestre do ano poidan traballar con certa normalidade", sinalou Rueda, que recoñeceu que ese novo marco podería incluír unha ampliación do horario para os negocios de lecer nocturno —agora fixado, como máximo, ata as 3.00 horas—.
