O presidente da Confederación Empresarial de Hostalería e Turismo de Galicia, Cheché Real, esixiu ás distintas administracións galegas un "maior control" sobre os botellóns e asegura que "o comportamento da xente que se está vendo en diferentes imaxes" é "bochornoso e absolutamente insolidario".
Cheché Real, ante a ameaza de peche do lecer nocturno que se estaría expondo o Ministerio de Sanidade, afanouse en deixar claro que "o lecer nocturno o conforman empresas legalmente establecidas". Cousa distinta, considera, son "os botellóns" que se producen en rúas, "prazas e en parques". "E iso non é lecer nocturno", sinala para pedir que "non se carguen máis as tintas" sobre un sector, como é a hostalería, tan "decimado" pola pandemia.
"Todas esas reunións sen máscara, sen cumprir ningún tipo de protocolos non se producen en locais legalmente establecidos que escrupulosamente levan a cabo todos os protocolos e manuais anti Covid", subliñou o empresario lucense. É por iso que demanda máis control sobre os botellóns. "Témolo que deixar claro para que as autoridades tanto sanitarias como políticas o entendan e non carguen contra estas empresas (do lecer nocturno), nin contra eses empresarios, nin contra os seus traballadores", subliñou.