O Parlamento de Galicia acolleu este martes o inicio dun dos plenos ordinarios máis longos dos que se ten constancia na historia da Cámara autonómica, que, no entanto, na primeira xornada só deu luz verde ao comezo da tramitación dunha nova norma legal.
Dos catro textos lexislativos sometidos a votación, unicamente recibiu o visto e prace do lexislativo galego para continuar cos trámites a nova lei de regulación do aproveitamento lúdico das augas termais de Galicia promovida pola Xunta, que, con este trámite, supera as emendas á totalidade presentadas pola oposición e inicia os traballos en comisión de cara á súa aprobación definitiva.
A iniciativa só contou cos votos favorables do PPdeG, que defendeu a proposta do Executivo autonómico de protexer "o uso terapéutico dos balnearios" e diferencialos do carácter lúdico doutros espazos termais.
Mentres tanto, a iniciativa lexislativa popular para a xestión pública dos saltos e aproveitamentos hidroeléctricos en Galicia, así como as proposicións de lei do grupo Común da Esquerda e do Grupo Mixto para, respectivamente, regular o xogo e as casas de apostas e reformar o Regulamento do Parlamento galego para unha maior accesibilidade topáronse coa posición contraria á súa tramitación por parte do grupo popular.
Este martes o pleno apenas se interrompeu á hora para comer, e prevese que a fórmula se repita o mércores
Ese foi o principal contido das primeiras horas dun pleno que arrincou coa elección mediante voto en urna de dous dos membros do Consello Social da Universidade de Santiago de Compostela, para despois dar conta do informe anual do Valedor do Pobo correspondente á súa actividade durante 2018.
A saturada orde do día incluía unha comparecencia da conselleira de Educación, Carmen Pomar
Sesións como a vivida este martes poñen de manifesto a dificultade para alcanzar consensos entre todas as forzas con representación na Cámara galega e evidencian a distancia existente entre as formulacións dos grupos da oposición e o maioritario PPdeG, cuxo voto non coincidiu en ningún momento na votación dos textos legais.