Cen días logo da súa chegada, Pablo Casado empeza a estar cuestionado por algúns dos principais baróns do Partido Popular, que verían con bos ollos que se activase a alternativa de Alberto Núñez Feijóo no caso de que o actual líder da formación conservadora non lograse un bo resultado nas próximas citas electorais, tal como predín as enquisas.
Así o expón El Confidencial Digital, que asegura que "a nivel interno empezan a escoitarse as primeiras críticas ao novo presidente". Engade o mesmo dixital que se lle acusa, entre outras cousas, de non romper coa etapa anterior, conservando a vicesecretarios sen forza e, ademais, mantendo en cargos relevantes a dirixentes que pertencen ao pasado e non ao futuro". Ademais, a Casado reprocharíaselle unha mala xestión do caso das gravacións do excomisario Villarejo a María Dolores de Cospedal, a quen, segundo algúns, non defenderon debidamente e deixaron ao pé dos cabalos antes de que acabase presentando a renuncia.
A alongada sombra do líder galego, Alberto Núñez Feijóo, volve pois planear sobre a rúa Génova, onde se valoran especialmente a súa capacidade de liderado, a súa capacidade de xestión e os seus éxitos electorais, ademais da súa experiencia. E é que algúns baróns seguen sen entender por que non deu o paso no seu día cando era o preferido pola maioría para conducir ao partido nesta era post Rajoy.
"Non remontamos nas enquisas e as perspectivas electorais non son prometedoras. En Andalucía ímonola pegar e en España temos case imposible recuperar o Goberno", sinala a ECD unha das fontes consultadas, que deixan entrever que un certo pesimismo se instalou no partido antes de tempo.