O secretario xeral do PSdeG, Gonzalo Caballero, explicou este martes que a súa intención é ocupar o posto de deputado que previsiblemente deixará libre Abel Losada tras a celebración das eleccións municipais do próximo 26 de maio.
"No momento en que Abel Losada tome posesión como concelleiro en Vigo darei un paso adiante para asumir a responsabilidade institucional de ser deputado no Parlamento galego", afirmou este martes Caballero, respecto da inclusión do actual parlamentario como número 5 na candidatura municipal do PSdeG na cidade galega.
"Todas as fichas están onde teñen que estar", engadiu en rolda de prensa o secretario xeral dos socialistas galegos, que non desvelou se, coa súa entrada, relevará a Xoaquín Fernández Leiceaga como portavoz parlamentario ou apostará por unha fórmula para compatibilizar ambos os liderados.
Nunha rolda de prensa ofrecida este martes na sede do partido en Santiago, Caballero defendeu que está "a dar os pasos" de acordo "á folla de ruta" que fixou para o partido tras imporse nas primarias para a elección de secretario xeral.
Así pois, logo de dilatar durante meses a súa chegada ao Lexislativo galego por entender que na "primeira etapa" do seu mandato debía exercer outro tipo de funcións, este martes apostou por pasar a formar parte da Cámara para "darlle presenza e fortalecemento a unha alternativa que está a avanzar" en Galicia e á que lle toca conseguir "posicións máis claras".
