Podemos repartiu cos seus socios minoritarios do grupo confederal as seis presidencias de comisión que terá Unidas Podemos esta lexislatura no Congreso, e só unha delas recaerá nun dirixente do partido morado, o secretario xeral do grupo, Txema Guijarro.
En concreto, a repartición premiou á confluencia catalá de En Comú Podem con dúas presidencias: a da Comisión de Ciencia, Innovación e Universidades, que será para o secretario primeiro da Mesa, Gerardo Pisarello; e a Comisión de Obxectivos de Desenvolvemento Sostible, para o deputado Joan Mena.
Nesa Comisión de Ciencia e Universidades é onde deberá comparecer o ministro de Universidades, Manuel Castells, que chegou ao Goberno de coalición auspiciado precisamente por En Comú.
Ademais, a deputada de EU Roser Mastro presidirá a Comisión de Cooperación internacional ao desenvolvemento, mentres que o portavoz de Galicia en Común, Antón Gómez-Reino, ocuparase da de Traballo, Seguridade Social e Migracións onde deberá comparecer como ministra a súa compañeira de filas Yolanda Díaz.
Para rematar, o exdeputado de Equo Juantxo López de Uralde, cuxo nome circulou para ocupar algún posto no Goberno, será quen presida a comisión de Transición Ecolóxica e Reto Demográfico que controlará á vicepresidenta Teresa Ribera.