O delegado do Goberno en Galicia, Javier Losada, defendeu este xoves que o cambio de Executivo á fronte do Estado permitiu esquecer a "España gris e triste" que caracterizou os anteriores mandatos do PP e de Mariano Rajoy.
Esta foi a idea central do discurso de Losada este xoves no almorzo informativo organizado en Santiago de Compostela por Fórum Europa, no que tamén asegurou que o actual Goberno está comprometido con Galicia e cos seus principais problemas.
Sobre o marco competencial, Losada insistiu en que o actual é un "Goberno galeguista, por corazón" e "por convicción", que está disposto a dialogar acerca da transferencia de novas competencias, aínda que sempre dentro do marco establecido na Constitución española e no Estatuto de autonomía.
"As últimas transferencias do Estado negociounas e alcanzounas o presidente Touriño en 2008"
Neste sentido, apuntou que "o reloxo" das transferencias "parouse hai dez anos" e que "as últimas transferencias do Estado negociounas e alcanzounas o presidente Touriño en 2008", polo que dixo non entender o fervor competencial no que se sumiu a Xunta de Galicia nas últimas semanas, aínda que pareza que xa deu marcha atrás.
Segundo Losada, a Xunta "xa é maior de idade e ten que resolver os seus propios problemas", posto que "para demandar competencias hai que atendelas e dar exemplo", algo que non cre que ocorra en Galicia vendo o estado da sanidade ou a recente folga da xustiza, "a máis longa de funcionarios da historia de España".
"Xa basta iso de acudir ao pai Estado cada vez que hai un problema", engadiu, antes de esixirlle ao Goberno galego que non pida competencias "só para lucirse" e de sinalar que Galicia é a terceira autonomía con máis transferencias só superada por Andalucía e Cataluña.
DÉBEDA. Losada tamén confirmou que o Consello de Ministros autorizará este venres á Xunta a emisión de 400 millóns de euros de débeda pública adicionais; e aproveitou a súa intervención para repasar outras medidas recentes do Goberno central e realizar unha argumentación en favor dos puntos positivos dos orzamentos xerais do Estado (PGE) para Galicia.
"Foi un cambio sereno e responsable para a rexeneración democrática, para a modernización económica e para o fortalecemento da cohesión territorial", sostivo Losada, que resumiu en catro compromisos a liña de acción do Executivo en Galicia: infraestruturas, política social, economía e innovación e autonomía.
Losada defendeu o "cambio sereno" do Goberno de Sánchez e destacou logros sociais e en infraestruturas para Galicia
En materia de infraestruturas, aludiu ao avance das obras do Ave e aos traballos para a inclusión de Galicia no Corredor Atlántico como eixos prioritarios da actuación gobernamental; xunto cunha xustificación do descenso en investimento de case o 20% previsto nos PGE.
A pesar destas cifras, insistiu en que o carácter social destas contas beneficia aos galegos grazas a medidas como o incremento das pensións ou do salario mínimo; mentres que, no bloque social, salientou a loita do Goberno contra a violencia de xénero "por moito que algúns o neguen e outros o xustifiquen" e presentou as últimas cifras contabilizadas en Galicia: 203 denuncias no primeiro mes do ano.
Así mesmo, estivo o presidente do Parlamento de Galicia, Miguel Ángel Santalices. Ademais, tamén se desprazaron ata este evento responsables das forzas e corpos de seguridade do Estado e representantes do tecido empresarial e académico de Galicia.
O líder do PSdeG, Gonzalo Caballero, considerou que o Goberno de Pedro Sánchez debe facer pedagoxía política" para explicar as súas decisións para buscar solucións "dentro do marco constitucional" ao conflito catalán e acusou ao Partido Popular de abrazar "á dereita e á dereitona".
