A secretaria xeral de Igualdade, Susana López Abella, destacou hoxe que Galicia é líder estatal en representación feminina nos Consellos de empresas galegas, aínda que apuntou á corresponsabilidade como "obxectivo clave" e "imprescindible" para lograr a igualdade no mercado laboral.
López Abella participou esta mañá en Culleredo (A Coruña) na xornada formativa Beneficios na xestión empresarial aplicando medidas de Igualdade, organizado pola Mutua Galega.
Durante a súa intervención, sostivo que é necesario impulsar esta corresponsabilidade como "contrapunto" para alcanzar a igualdade "completa" no mundo laboral, pois "mentres a muller continúe desempeñando unha dobre ou tripla xornada fronte aos homes, non se poderá falar dunha igualdade real".
Neste contexto, recordou que a Xunta convoca anualmente a través do seu departamento axudas e subvencións para programas de promoción da igualdade en entidades locais e para homes que reducen a súa xornada laboral para o coidado de fillos menores de tres ano, co fin de conseguir este obxectivo.
A secretaria xeral de Igualdade destacou o "incontestable" impacto positivo das medidas contempladas na lexislación sobre igualdade de xénero, como a loita contra a discriminación, as cotas de representación ou os plans de igualdade nas empresas.
