Galicia, con cinco mortos por afogamentos, sitúase entre as comunidades autónomas que rexistraron máis vítimas mortais por esta causa o pasado mes de setembro, segundo os datos do Informe Nacional de Afogamentos da Real Federación Española de Salvamento e Socorrismo. Esta comunidade, rexistrou de xaneiro a setembro un total de 41 falecidos por afogamento, o que supón un 11,5 % dos contabilizados en España.
A cifra total de mortes por afogamento nos espazos acuáticos españois nos nove primeiros meses do ano ascende a 356, un 17,5 % máis con respecto ao mesmo período do ano anterior, ao terse rexistrado 53 falecementos máis. Segundo o Informe Nacional de Afogamentos (INA), no mes de setembro perderon a vida 49 persoas, tres menos que no mesmo mes do ano anterior polo que, segundo a Federación, setembro sitúase como o segundo peor mes dos últimos 5 anos.
Só o ano pasado, con 52 vítimas contabilizadas en setembro, supera á cifra rexistrada en 2019.
A Comunidade Valenciana, con 11 afogamentos, sitúase á cabeza no mes de setembro, seguida de Andalucía e Cataluña (7 en ambas) e Baleares, Canarias e Galicia (5 en cada unha delas). Outras tres vítimas contabilizáronse o pasado mes en Castela-A Mancha e unha en Asturias, Cantabria, Castela e León, A Rioxa e a cidade autónoma de Melilla.
No conxunto do ano, practicamente coinciden as comunidades autónomas con maior número de vítimas: Comunidade Valenciana (57), Cataluña (47), Andalucía (43) e Galicia (41). En canto ao perfil, o 37,1 % das persoas afogadas no que vai de ano tiñan 65 ou máis anos, mentres que os 27 menores de 18 anos falecidos representan o 7,6 % e dez deles tiñan entre 11 e 17 anos.
En todo 2019, o perfil da vítima corresponde a un home (78 %), de nacionalidade española (76 %).
