A Consellería de Sanidade non comunicou este venres ningún novo falecemento vinculado coa covid-19 en Galicia. Deste xeito, o número de vítimas desde o inicio da pandemia mantense en 2.393.
En concreto, a última morte comunicada polas autoridades sanitarias galegas foi na xornada do xoves, cando a Xunta informou o falecemento dun home de 78 anos que perdera a vida o Hospital Universitario Lucus Augusti. O home fora diagnosticado coa covid-19 e tiña patoloxías previas.
A última xornada na que as autoridades sanitarias galegas non comunicaron ningún falecido foi o pasado martes. Con todo, é habitual que as comunicacións se fagan con días de atraso, ata que son confirmadas por Saúde Pública.
