O outono galego foi "moi cálido" e seco, e tras el virá un inverno con temperaturas que seguirán sendo máis altas do habitual e no que se esperan menos precipitacións das que se adoitan rexistrar nesa época do ano.
Esa é polo menos a análise e a previsión da Axencia Estatal de Meteoroloxía, cuxa delegación en Galicia presentou este xoves o resumo climático do outono de 2020, o balance hídrico e a predición estacional para o primeiro trimestre de 2021.
Francisco Infante, delegado de Aemet, revelou que o trimestre finalizou co cuarto novembro máis cálido da serie histórica de Galicia, cunha anomalía de +1,8 graos centígrados. A temperatura máis alta rexistrouse en Ribadavia os días 12 e 13 de setembro (38,3 graos), mentres que a mínima absoluta rexistrouse en Xinzo de Limia o 23 de novembro (-4,1 graos).
O outono 2020 foi moi cálido en Galicia, cunha anomalía de temperatura de +0.8 ºC con respecto ao valor normal.
— AEMET_Galicia (@AEMET_Galicia) December 17, 2020
O mes de novembro foi o 4º máis cálido dos novembros da serie histórica de Galicia; outubro foi frío e setembro cálido. pic.twitter.com/07ysiMn4tW
No que se refire ás precipitacións, o trimestre foi entre seco e moi seco para o conxunto de Galicia, cunha porcentaxe de choiva acumulada que queda no 70% da media. Segundo Infante, todos os outonos desde 2011 a 2020 mantiveron a tendencia.
Por meses, setembro foi entre cálido e moi cálido, con temperaturas que superaron os valores normais en toda Galicia. As choivas dese mes foron en xeral "de pouca importancia" e dispersas durante a primeira quincena, tras o que se fixeron máis frecuentes.
Outubro foi frío, con temperaturas inferiores á media, e precipitacións con fortes contrastes entre unhas e outras zonas. Con todo, novembro foi "moi cálido" e "seco", con zonas do leste nas que as choivas recollidas non chegaron nin a un 40% dos valores normais. Entre os observatorios principais, só Santiago aeroporto (82%) e Lugo Rozas (70%) superaron o 50%.
Nun decembro húmido, as borrascas afectarán a Galicia ata o día de Noiteboa
A primeira quincena de decembro deixou temperaturas "normais" para esta época do ano e está a resultar ser un mes "húmido", con cantidades acumuladas que superan xa o 60% do total mensual.
Así as cousas, sen computar decembro, o ano 2020 está a resultar "extremadamente cálido" en Galicia. Só estiveron por baixo das temperaturas normais xuño e outubro. "Imos concluír moi probablemente como o ano máis cálido da serie histórica en Galicia", que arrinca en 1951, augurou Infante.
Iso si, as borrascas afectarán ata o día de Noiteboa. Daquela empezará a cambiar a situación e haberá un descenso de temperaturas, con xeadas ata final de ano.
"Estamos preto de entrar na Uci", dixo, ao ser preguntado sobre esa cuestión. Así, incidiu en que hai que "implementar medidas xa" e insistiu en que "non temos moita marxe" ante un aumento da temperatura global "1,2 graos centígrados por enriba da época preindustrial".
E é que a tendencia de menos "frío" que se rexistra en Galicia vincúlaa co cambio climático.
