Amplo seguimento á folga en Atención Primaria en Pontevedra e A Coruña

O Sergas sitúa o seguimento nun 21% mentres os convocantes elévano ao 50%

Manifestación de Atención Primaria en Santiago. LAVANDEIRA JR
photo_camera Manifestación de Atención Primaria en Santiago. LAVANDEIRA JR

O persoal da Atención Primaria en Galicia celebra este mércores unha xornada de folga para esixir á Xunta un aumento do tempo de consulta dos facultativos, máis recursos humanos, un incremento do seu orzamento, a eliminación das xerencias integradas e mellores contratos para médicos novos.

A folga, convocada pola Asemblea de Áreas Sanitarias de Galicia, segundo a Consellería de Sanidade da Xunta tivo un seguimento dun 21%, mentres que segundo os organizadores foi seguida por un 50 % -e de preto do 100% nas cidades da Coruña e Vigo-.

En paralelo á folga, uns 400 facultativos manifestáronse polas rúas de Santiago de Compostela, facendo un percorrido desde o Edificio Administrativo da Xunta en San Caetano ata a sede da Consellería de Sanidade en San Lázaro, onde expresaron as súas demandas.

"Vémonos obrigados a reclamar unha atención sanitaria óptima para todos os cidadáns, xa que estamos a desempeñar o noso traballo en circunstancias moi por baixo dos estándares desexables, sen tempo para atender as necesidades dos pacientes", denunciou o portavoz da asemblea, Carlos Eirea.

"Vémonos obrigados a reclamar unha atención sanitaria óptima para todos os cidadáns, xa que estamos a desempeñar o noso traballo en circunstancias moi por baixo dos estándares"

Os facultativos tamén pediron "desculpas polos prexuízos que a folga poida ocasiona" a pacientes e persoal de urxencias, aínda que esta folga "foi unha medida extrema ante a resposta dos nosos actuais xestores, que consiste en negar a evidencia, facer promesas baleiras de contido e menosprezar ao colectivo".

"Levamos demasiado tempo pedindo unha sanidade pública universal e igual para todos, cunha atención primaria digna", proseguiu o portavoz, quen sinalou que "o importante non son as porcentaxes de seguimento, senón a repercusión, e a realidade é que hoxe os centros de saúde de toda Galicia están baleiros".

Con respecto aos próximos movementos dos facultativos, a asemblea alertou sobre "a carga de traballo que virá no verán" e pediu aos médicos que envíen cada quince días "información da situación de cada centro" para poder facer un balance centralizado unha vez pase o período estival.

O Sergas defende as súas medidas
Pola súa banda, o xerente do Servizo Galego de Saúde (Sergas), Antonio Fernández-Campa, denunciou que a folga "non achega nada ao traballo que xa se está realizando", xa que entende que "causa molestias aos cidadáns" e "non variará o traballo actual nin o que se fará a continuación".

"Xa estamos a traballar cos colexios profesionais e os sindicatos e ata agora estanse cumprindo todos os compromisos e prazos", sinalou Fernández-Campa en declaracións a Efe na que destacou que a día de hoxe xa se puxo en marcha o 70 % das accións a curto prazo previstas polo Plan Galego de Atención Primaria 2019-2021.

Deste xeito, Fernández-Campa achaca a convocatoria desta folga a unha problemática "que se dá en todo o Sistema Nacional de Saúde, non só en Galicia", xa que esta partiría da "falta de médicos de familia, unha especialidade na que non hai paro", unha situación "que en Galicia se está intentando mellorar".

"Tomamos medidas, como aprobar unha Oferta Pública de Emprego (Ope) de 500 prazas para a atención primaria, conseguir que o Ministerio de Sanidade aprobase máis prazas para formar médicos de familia e pediatras ou garantir máis prazas para aqueles centros cunha maior presión asistencial", relatou o xerente.

Fernández-Campa destacou que o Sergas "está absolutamente aberto a recibir propostas" e que Galicia "é unha das poucas comunidades que elaborou un documento con medidas concretas e estaas implementando".

Con todo, o xerente do Sergas asegurou que durante a xornada de folga "non houbo ningunha incidencia" e o servizo "está a desenvolverse con total normalidade", tendo en conta que se están cumprindo cos servizos mínimos.

 

Sen o apoio de SOS Sanidade Pública
A folga convocada este mércores non conta co apoio de SOS Sanidade Pública, os sindicatos e diferentes colexios profesionais, quen desconvocaron a folga en abril despois de que o Sergas aceptase crear un Consello Técnico de Atención Primaria cuxa actividade arrincou a semana pasada.

Sindicatos e colexios profesionais advertiron de que retomarán as mobilizacións no caso de que o Sergas non aplique as medidas vinculantes que decidan as quince comisións técnicas que acordaron constituír; a xerencia, pola súa banda, asegura que está "a cumprir con todas as demandas e todos os prazos". 

Comentarios