As tensións entre a dirección galega e a estatal do PSOE seguen á alza, esporeadas pola polémica pública entre os afíns ao actual secretario xeral do PSdeG, Gonzalo Caballero, e os seus detractores. E un novo capítulo, precisamente, deriva dun suposto intento do político de Ponteareas de adiantar a setembro as primarias polo liderado do partido, rexeitado por Ferraz.
No entanto, fontes internas negan que se formulou proposta algunha neste sentido e recalcaron que "a próxima semana" está fixada "unha nova reunión" entre os equipos de PSdeG e PSOE para "abordar conxuntamente" os asuntos relativos aos procesos internos pendentes: estas primarias e o congreso autonómico, dúas citas que se celebran unha seguida da outra.
Fontes da dirección federal, citadas por eldiario.es, confirmaron este intento de levar as primarias galegas ao 26 de setembro, un prazo curto, inferior a un mes, que coincide coa intensificación dos contactos de Caballero con alcaldes e agrupacións locais e coas voces que sinalan que o presidente da Deputación da Coruña, Valentín González Formoso —un dos destinatarios dos duros reproches que o secretario de organización do PSdeG, José Antonio Quiroga, lanzou contra o sector crítico na un artigo publicado no Progreso—estaría disposto xa a postularse como candidato a comezos do próximo mes.
Con todo, estas fontes recalcan que, segundo marca a normativa interna da formación, este proceso interno debe celebrarse con posterioridade ao congreso federal do partido, que será entre o 15 e o 17 de outubro. é, a partir desa data, cando as federacións autonómicas deben emprender a renovación dos seus órganos directivos, que deberá estar lista antes de que conclúa o ano.
Pablo Arangüena insistiu na "fluidez" desta relación e proclamou que o "futuro do PSdeG van decidir vos militantes de Galicia"
Neste contexto, desde o sector crítico sinalan que, nas últimas dúas semanas, Caballero transmitiu a varios alcaldes de Lugo que ía adiantar as primarias, co presunto visto e prace de Ferraz, nun proceso ‘express' destinado, afirman, a dificultar a presentación dunha alternativa ao acurtar os prazos para as precandidaturas e a recollida de avais ata o 5 de setembro. Aínda así, aseguran que a proposta foi "tombada" pola dirección federal e sitúan no 6 de novembro a data na que a militancia deberá votar á secretaría xeral do PSdeG.
Agora, de face a este proceso, aseguran que o apoio de Madrid está con Formoso e que, de feito, a finais de xullo, xa se lle trasladou a Caballero "que se fixese ao carón", aínda que o que terminou por darlle a "puntilla" foi "o ataque preventivo" de Quiroga contra os seus posibles rivais, Formoso e o exsecretario xeral José Ramón Gómez Besteiro, a quen acusou de encabezar manobras para menoscabar a posición do actual líder do partido, ademais de afearlles a súa política á fronte do Concello das Pontes e as causas xudiciais abertas na súa contra, respectivamente. Un posicionamento que os críticos destacan tendo en conta de que, entre as funcións da secretaría de Quiroga, está a de organizar o proceso de primarias.
PRÓXIMA REUNIÓN. Pero, a pesar de todas estas afirmacións, fontes próximas á dirección galega subliñan que é o comité nacional galego o órgano ten a facultade de convocar o congreso —que se celebra logo das primarias á secretaría xeral—. E recordan que, polo momento, nin o comité nacional nin a comisión executiva do PSdeG "aprobaron ningunha proposta de calendario nin convocaron" o congreso, que se celebrará antes de mediados de decembro.
En paralelo, encadran a reunión prevista para a próxima semana "na liña de traballo habitual e conxunto" que manteñen as direccións autonómica e federal, e remarcan a "boa, continua e fluída" relación entre as súas respectivas secretarías de organización. Neste sentido, afirman que tanto as primarias para elixir a secretario xeral como a data do congreso son cuestións que se abordan de forma conxunta entre ambas as direccións.
Pola súa banda, o vicesecretario xeral do PSdeG, Pablo Arangüena, insistiu na "fluidez" desta relación e proclamou que o "futuro do PSdeG van decidir vos militantes de Galicia, vai dicir en Galicia, como non pode ser doutra maneira". Respecto diso, reiterou que "non hai proposta de data" para o congreso galego nin para as primarias.
