Un home de 41 anos foi atropelado este mércores cando cruzaba por un paso de peóns en Arteixo. Segundo a Garda Civil, o home, un cámara da TVG que cruzaba para preguntar por unha dirección, foi arroiado por un vehículo conducido por un home de 87 anos.
O accidente produciuse diante do cuartel da Garda Civil de Arteixo, polo que o ferido foi auxiliado por axentes ata que chegaron dúas unidades do 061. Foi trasladado ao hospital da Coruña (Chuac) e sofre fracturas en tibia, peroné e un nocello.
O condutor deu negativo na proba de alcol e asegurou que non viu esta persoa cruzar.