O presidente da Xunta, Alberto Núñez Feijóo, mantén a incógnita sobre a que sería a sexta remodelación do seu Executivo e que no PPdeG se agarda de forma "máis ou menos inminente", dado que se dá por feito que, se non é de máis calado, como mínimo o Goberno galego terá que ser retocado para cubrir os ocos de Beatriz Mato e José Manuel Rey Varela. Polo momento, o titular do Executivo autonómico expresou non ter "ansiedade" por este cambio, mentres asegura que se manterá a estabilidade.
A conselleira de Infraestruturas, Ethel Vázquez, subliñou, en relación coa remodelación no Goberno galego que prevé levar a cabo Alberto Núñez Feijóo, que o "presidente sabe cando hai que facela e como hai que facela".
A preguntas dos medios este luns, a conselleira indicou que é unha "decisión" do titular do Executivo autonómico, que "sabe o que ten que facer cando o ten que facer".
No tocante ao anuncio do pasado sábado do conselleiro de Política Social, José Manuel Rey Varela, de presentarse como candidato do PPdeG para ser alcalde en Ferrol, mentres aínda é titular desta carteira, Ethel Vázquez identificouno cunha "decisión persoal a consecuencia do goberno actual que hai no Concello de Ferrol", "o goberno ausente".
Pola súa banda, o portavoz de En Marea, Luís Villares, demandou ao presidente galego que cese "inmediatamente" os conselleiros de Política Social, José Manuel Rey Varela, e de Medio Ambiente e Ordenación do Territorio, Beatriz Mato, por uso "espurio" da Xunta.
O líder de En Marea demandou este cesamento despois de que a súa formación critique "desde hai un ano o uso electoralista do Goberno de Núñez Feijóo" que mantén a unhas "institucións que son de todos ao servizo do partido", en relación cos conselleiros, que aspiran a ser candidatos ás próximas eleccións municipais en Ferrol e A Coruña, respectivamente.
Reclamou xa que logo un cesamento inmediato que acabe co uso "espurio" que os responsables autonómicos están a facer do seu cargo no Executivo.
Villares acusa a Feijóo de facer un uso "espurio" da Xunta e Pontón cre que a utiliza de "incubadora de alcaldes"
Mentres, a portavoz nacional do BNG, Ana Pontón, acusou a Feijóo de usar ao Goberno galego como "unha prolongación do comité electoral do PP".
Pontón denunciou que Núñez Feijóo emprega o seu Executivo como unha sorte de "incubadora de candidatos" de cara ás distintas eleccións, posto que a súa única preocupación -indicou- é "como lle vai a ir electoralmente ao PP".
Nestes termos referiuse a dirixente nacionalista á remodelación de goberno que se prevé que se produza nas próximas semanas e que, na súa opinión, non servirá para cambiar o actual rumbo emprendido por Galicia, xa que este só se rectificará cunhas "eleccións nas que Feijóo dea un paso atrás". Segundo a líder do BNG, o mandatario autonómico está "esgotado, sen ideas, sen nada novo que ofrecerlle aos galegos".
