A petición da Xunta para que o Goberno acometa reformas legais para restrinxir a mobilidade de comunidades como Madrid ou Barcelona se hai rebrotes provocou numerosas reaccións este luns. Desde o alcalde da capital de España, José Luís Martínez-Almeida, que non ve "madrileñofobia" nas palabras de Alberto Núñez Feijóo, ata Ciudadanos e Vox, que observan xustamente o contrario: que o presidente galego alenta o "sinalamento" entre persoas.
ALMEIDA. En concreto, o alcalde de Madrid non aprecia "madrileñofobia" nas palabras do presidente galego e instou aos madrileños ante a inminente posibilidade de desprazarse dunha provincia a outra que se guíen pola prudencia.
‼️Feijoo debe rectificar ya!!
La propuesta de @FeijooGalicia es irresponsable e inaceptable como presidente de la Xunta, al alentar el señalamiento entre personas e impedir que muchos gallegos que viven fuera de Galicia puedan volver para reencontrarse con sus familias. pic.twitter.com/1Esom9LCfP— Beatriz Pino 🖤🇪🇸 (@Beatriz_Pino_) June 15, 2020
Almeida contestou así nunha entrevista en Telemadrid, recollida por Europa Press, despois de que Feijóo declarase esta fin de semana que "España necesita unha norma de saúde pública que permita prohibir a mobilidade de determinados territorios nunha situación de pandemia se o número de contaxios segue sendo alto".
O rexedor encomiou as intervencións previas que fixeron madrileños do montón por ser toda "unha lección de sentido común" ao entender que exista "certa prevención por ser Madrid a zona cero" dos contagios.
Á cidadanía recomendoulle que se siga guiando pola prudencia, que se manteñan as distancias físicas, o uso de máscara e xel hidroalcohólico para "disipar calquera dúbida".
VOX: "NACIONALISMO EXCLUÍNTE". En sentido contrario pronunciouse o portavoz do Comité de Acción Política de Vox, Jorge Buxadé, quen criticou que Feijóo pida restricións á mobilidade naqueles territorios con peor situación epidemiolóxica e lamentou que caia no discurso do "nacionalismo excluínte".
En rolda de prensa, Buxadé recoñeceu a súa "alarma" polas palabras de Feijóo pedindo mecanismos para controlar a libre circulación. "Os españois temos todo o dereito a circular e residir en todo o territorio nacional sen restrición algunha", defendeu sinalando a contradición que suporía que madrileños ou cataláns puidesen viaxar a Bruxelas ou a Berlín pero non a Santiago de Compostela ou A Coruña.
Ao seu xuízo, esta postura é síntoma da "insolidaridad" que se está fomentando en España e que converte aos presidentes autonómicos en pequenos "caudillos dos seus reinos de taifas". "Eu son catalán e agora resido en Madrid, para Feijóo eu son un dobre apestado", censurou Buxadé.
CIUDADANOS: "IRRESPONSABLE". Pola súa banda, a candidata de Ciudadanos á Xunta, Beatriz Pino, considera que a proposta de Feijóo é "irresponsable e inaceptable, ao alentar o sinalamento entre persoas e impedir que moitos galegos que viven fóra de Galicia poidan volver para reencontrarse coas súas familias".
