Feijóo: "Que gañe a democracia sobre os que asustan á xente"

"Temos máis experiencia que os que están na Moncloa", dixo no peche da campaña
Feijóo, en el acto de este viernes en A Coruña. EFE
photo_camera Feijóo, no acto deste venres na Coruña. EFE

O presidente da Xunta e candidato do PPdeG á reelección, Alberto Núñez Feijóo, despediu este venres a campaña electoral, na súa penúltima parada da xornada, na Coruña, cunha chamada aos galegos para que acudan ás urnas nun escenario marcado polo brote da Mariña lucense e despois de que varios partidos propoñan suspender as eleccións na zona. "Pido que en Galicia tamén gañe a democracia sobre os que asustan á xente", proclamou. 

Tras percorrer seis das sete grandes cidades galegas —e minutos antes de dirixirse a Ferrol para pechar formalmente a súa campaña—, Feijóo pediu o voto "coa humildade" de quen sabe "que un político non é nada se a xente non lle vota" e garantiu ante case un milleiro de persoas congregadas na cidade herculina que el non se presenta "para derrotar a ninguén" porque, tras tres maiorías absolutas consecutivas, xa lle chegan as veces que gañou "grazas aos galegos". 

"Preséntome para que Galicia gañe, non para derrotar a ninguén. Pido que en Galicia tamén gañe a democracia sobre os que asustan á xente. Pídolles a todos os galegos: ¡Tomade o protagonismo o domingo, non deixedes que Galicia perda o rumbo! Votade libremente. Os que non queren que votemos, non queren democracia", apelou como arenga final no seu mitin coruñés. 

"Que dean unha lección de democracia ante todos os que están a meter medo á xente", insistiu antes de lanzar un aviso: "Os que din que non vaian os galegos a votar si que van ir a votar". "Quizais o que queren é ir eles e que non voten os demais", remarcou, antes de reiterar que non se pode privar de votar a máis de 50.000 persoas na Mariña cando os positivos roldan os 180 e hai dous hospitalizados. 

Feijóo lanzou esta mensaxe nun nutrido mitin celebrado nos xardíns de Santa Margarita, ata onde se desprazaron, segundo a organización, uns 900 militantes e simpatizantes. 

O líder do PPdeG insiste en que os colexios electorais son seguros

Tamén os traballadores de Alu Ibérica, cos que Feijóo prometeu reunirse a semana que vén "como presidente", levaron as súas protestas a este acto electoral. 

Minutos antes, nun acto celebrado en Lugo, Feijóo quixo mandar un mensaxe de optimismo "á Mariña lucense", sobre todo a Burela, onde se concentra o maior número de infectados polo brote de coronavirus. 

Feijóo, en Lugo. VITORIA RODRÍGUEZ

Así, destacou que no hospital de Burela "só hai dúas persoas xa hospitalizadas", mentres chamou a votar na Mariña "polo futuro da comarca e de Alcoa". E remarcou: "Sobre todo por eles". 

O presidente do PPdeG tamén pediu aos positivos por coronavirus "que non vaian votar por prudencia", pero deixou claro que "non podemos cercenar os dereitos de toda unha comarca". Respecto diso, recordou que nas últimas eleccións foron a votar na Mariña unhas 56.000 persoas. 

Na última xornada de campaña, Feijóo tamén pediu o voto de quen queira "que goberne o que gañe as eleccións". "Xamais asumirei a presidencia se perdo", comprometeu e reclamou o voto "en liberdade", pero coa garantía de que non se poderá atopar "un equipo máis sólido, cohesionado e con experiencia" que o seu. "Temos máis experiencia que os que están na Moncloa", dixo.

Comentarios