O presidente da Xunta, Alberto Núñez Feijóo, avanzou este mércores a proposta de ofrecer contratos de entre un e tres anos aos médicos de familia e pediatras formados en Galicia unha vez acaben o período de residencia (MIR).
Núñez Feijóo dixo na sesión de control do Parlamento galego a preguntas de BNG e En Marea que esta é unha das propostas nas que traballa a Xunta para mellorar a situación da sanidade, sobre todo en atención primaria, tras as protestas xeneralizadas de pacientes, sindicatos, partidos e profesionais dos últimos meses.
Entre outras medidas, tamén destacou que a Xunta creará a figura do responsable, director de Atención Primaria en todas as xerencias hospitalarias.
A portavoz nacional do BNG, Ana Pontón, centrou a primeira parte da súa intervención na lectura de distintos testemuños de profesionais médicos que cuestionan a política sanitaria da Xunta, con denuncias de recortes e precarización do seu traballo, e cualificou a Núñez Feijóo de ser "un perigo" para a sanidade pública.
Luís Villares, portavoz de En Marea, cuestionou o presidente galego sobre unha transferencia interna no pasado mes de novembro pola que se cambiaron uns dous millóns de euros de distintas partidas para adxudicalos " sanidade privada".
Núñez Feijóo aludiu a razóns de execución orzamentaria esta acción e reprochou a Villares que unha parte dese diñeiro correspondía á construción e reforma dun centro de saúde e un punto de atención continuada en Cangas (Pontevedra), onde gobernan "as mareas", e que non ofrecen os terreos necesarios.
Na súa opinión, ademais, con esta pregunta o portavoz de En Marea confirma que "toca de oído" na Sanidade e descoñece como se xestiona un orzamento de case 4.000 millóns de euros nesta área.